Aš su se poklopile tri godišnjice: devedeset i pet let je pasalo od njegovega rojenja, dvajset od kada je umrl, a pedeset let od kad je va eter šla prva čakavska emisija.

Uputil ju je baš Ljubo Pavešić, Škrljevčan, rojeni čakavac, radijski novinar i publicist i  čakavski pjesnik.

Ovako je videl samega sebe 1975. leta kad mu je štampana prva samostalna čakavska zbirka pjesam „ Mamina starina“:

Po bure, ka hita grmi dole, 28. jenara 1919., Ljubo se j rodil va Škrljeven, selu va okolice Rike. Nekuliko dan kasneje majka Kata ga pofašanoga – kot da nosi fagot – ponesla krstit. Povedaju da se malčić plakal više na vodu leh na sol. Pučku školu finil je va Kukuljanoven, gimnaziju na Sušaku. I šal je va život ... Delajuć va novinah na Sušaku, v Rike, Bujah, Zagrebu i sopet v Rike, va trejset let takovoga posla napisal je pet biografij narodneh heroj: Joakima Rakovca, Nine Sovilja, Franje Ogulinca-Selje, Milisava Dakića i Mata Blažine, pa dve knjigi crtic z rata – „Pjesma na stretištu“ i „ I krv je tekla kršem“ i uredil minijaturni kanconjer čakavci zmed Učki i Velebita – „Besedi s kamika i z mora“. Piše još vavek i uz smeh i suzu jadri dalje ...

Ljubo Pavešić je kako radijski novinar va moderan medij onega vremena stavil domaću besedu. S ten je osigural bržo širenje čakavskega zajika, onda su ga stručnjaki zvali dijalekt, pa i njegovo širenje zvan samega čakavskega prostora va našoj sadašnjoj Primorsko-goranskoj županije.

Delal je tjedne čakavske emisije za Radio Reku, mjesečne za drugi program Radio Zagreba. Prvo javjanje odbavjal je kako Grga Ćakulica s kratkemi i humornemi crticami. Zaten je osnoval Mantinjadu bez mužike, pa Mantinjadu z mužikun i na kraje emisiju S primorske poneštrice. Za Zagreb je pošijal svoji i prilogi od svojeh suradniki za emisiju Naši krajevi u riječi i muzici.

Sredu, 29. januara na 6 ur zapolne va Narodnoj čitaonice na Korze na njega će se spametit oni ki su š njin delali na radiju, va pisanjen, poznavali ga kot čoveka: Cvjetana Miletić, Vlasta Sušanj Kapićeva i dr. sc. Nikica Petković.

Ove su Ljubine obljetnice bile poticaj da se zadnja Zavičajna sreda va meseceh ki prihajaju, posveti i drugen čakavsken pjesnikon keh već ni mej nami, da se ne pozabe, a i da mi odbavimo svoj dug svojen juden ki su nas zadužili va čuvanjen i čakavsken pisanjen, svojmu zavičaju i zajiku.

zapisala: Vlasta Sušanj Kapićeva

Rečki organeti

Z rečkoga turnja ura stara
friške uri tuče (...).

Z ruzinaveh pergul i po poneštrah,
kako i na oneh gala feštah,
banderaju na špagu štraci, kanotjere,
ordenji muški, ženski – se vrsti bandjere.

Zrak diši po friganeh ribah,
s tarulja dime kusi palente.
Fritulin vabi: „Si beve per niente,
che osteria, ma che brava gente!“

Po oštarijah sopu organeti (...).

O, tempi pasati
za ćakule i vino,
ni već oštarij
i ne sope organino.

Na špagu ni bander,
a ni ni stareh kuć,
rečki Stari grad
šal je zbogon – fuć.

(...)

Rečki Stari grad: oštarije, poseban svit kurab, mesto za ljubav, kar, barufi i napijanja, za kanat z grla i z organini. Tu se zahajalo va đačko vrime, va mladićsko i kasneje. Kad su stare kući zrušene i stanari preseljeni, niki za ničeren ni više žalel.

Ljubo Pavešić